Rinis mësimi në të gjithë vendin pas 3 ditësh mbylljeje nga i ftohti

Në shkollat e gjithë vendit ka rinisur sot procesi mësimor, pas një ndërprerje 3 ditore për shkak të motit të keq në vend.

Ministria e Arsimit vendosi ditën e premte që të pezullojë mësimin duke nisur nga dita e hënë deri të mërkurën, pas parashikimit për temperatura ekstreme deri në -17 gradë celsius.

Temperaturat e ulëta shkaktuan mjaft probleme në vend, që nga bllokimi i rrugëve e deri tek ngricat në sistemin e ujësjellësit.

Ndërkohë, ministrja e Arsimit Evis Kushi mohoi që mungesa e ngrohjes në shkolla të ishte i vetmi shkak për pezullimin e mësimit, pasi sipas saj ka pasur një sërë faktorësh që çuan në marrjen e këtij vendimin.

Nga Ministria e Arsimit është bërë e ditur se orët e humbura do të zëvendësohen, por nuk është dhënë një datë konkrete se kur do të realizohen.