Rreth 20,000 të huaj aplikuan për të luftuar në Ukrainë

Ndërsa banorë të Ukrainës po largohen nga vendi për shkak të pushtimit rus, gati 20,000 qytetarë të huaj kanë aplikuar për të shkuar në Ukrainë e për të luftuar kundër Rusisë.

Kjo shifër është bërë publike nga ministri i Jashtëm i Ukrainës, Dmytro Kuleba.

Publikimi i shifrës vjen një ditë pasi qeveria ukrainase hapi një faqe interneti për aplikime.

Kuleba tha se vullnetarë nga 52 vende kanë aplikuar deri më tani për t’iu bashkuar luftimeve.

Ai shtoi se nuk do ta bëjë publike se nga cilat vende kanë ardhur aplikimet.

Më herët sot, kreu i forcave të armatosura të Mbretërisë së Bashkuar i tha BBC-së se britanikët nuk duhet të shkojnë në Ukrainë për të luftuar, dhe në vend të kësaj duhet të ndihmojnë sado që të munden në rrugë të tjera.