Lufta në Ukrainë trondit bursat evropiane

Parashikimi për ekonominë globale po bëhet gjithnjë e më i zymtë për shkak të luftës në Ukrainë. Tregjet financiare evropiane u hapën në rënie ditën e hënë, duke reflektuar frikën se pushtimi ukrainas po ndikon në tërë kontinentin e vjetër.

Kështu, bursa e Frankfurtit ra me 3.67%, ajo e Parisit me 2.88% dhe ajo e Milanos 2.45%. Ndërkohë, tregu financiar rus do të rihapet të martën.

Lufta, kriza e refugjatëve dhe efektet bumerang të sanksioneve të vendosura ndaj Rusisë janë ndjerë në të gjitha tregjet. Edhe në Azi, indeksi i bursës së Tokios ra me 3% ditën e hënë.

Por nëse ka një frikë që dominon mbi të tjerat është ajo e shpërthimit të çmimeve të karburanteve. Shtetet e Bashkuara dhe Bashkimi Evropian po shqyrtojnë vendosjen e embargos ndaj naftës ruse, gjë që është reflektuar tek rritja me 10% e çmimit për fuçi.

Çmimi i naftës amerikane ishte mëngjesin e së hënës pranë kuotës 126 dollarë për fuçi, jo shumë larg rekordit historik të regjistruar në korrik të 2008-s, kur u rrit mbi 145 dollarë.