Alqi Bllako dorëzon mandatin e deputetit pas urdhër-arrestit të SPAK

Deputeti i Partisë Socialiste, Alqi Bllako ka hequr dorë nga mandati i deputetit pas urdhër-arrestit të SPAK për korrupsion lidhur me inceneratorin e Fierit.

Përmes një postimi në faqen e vet në Facebook, Bllako shprehet se ndihet i tronditur nga kërkesa e SPAK, por se ka vendosur të përballet me drejtësinë si njëri i thjeshtë pa pasur privilegjet e deputetit.

“Prandaj kam vendosur që ditën e nesërme t’i paraqes Kryetares së Kuvendit dorëzimin e mandatit tim si deputet i Republikës së Shqipërisë, dhe të përballem me akuzën pa asnjë privilegj. Si një qytetar i zakonshëm, si prind dhe familjar i përgjegjshëm; dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë!” shkruan Bllako në Facebook.

Deputeti socialist Alqi Bllako dhe ish-ministri i Mjedisit Lefter Koka dyshohet se kanë falsifikuar dokumentin për llojin e tokës ku do të ndërtohej inceneratori i Fierit. Ata ia kanë paraqitur qeverisë sikur ndërtesa e inceneratorit do të bëhej në tokë truall. SPAK ka provuar se ajo është ndërtuar në tokë arë, vlera e së cilës është më e lirë. Ky falsifikim i ka sjellë buxhetit të shtetit një dëm prej rreth 140 mijë eurosh.

LEXONI GJITHASHTU:

• Gazetari i ‘Birn’ tregon lidhjen e Alqi Bllakos me inceneratorin e Tiranës
• Korrupsion dhe pastrim parash, SPAK akuza zyrtare për Kokën dhe Bllakon