Rama sulmon SPAK-un: Jeni në prag të skualifikimit, po na soset durimi

Kryeministri Edi Rama u tregua shumë kritik ndaj punës së SPAK, të cilën e cilësoi tallje të madhe me shqiptarët.

Rama tha se SPAK është duke e humbur luftën me të keqen në vend, ndërsa paralajmëroi se durimit të qeverisë lidhur me këtë situatë po i vjen fundi.

“Ia përsëris SPAK, keni hetuar për këdoqoftë që i përket kësaj bashkësie, bujrum hetoni! Në nivelet me të larta… bujrum. Por realisht po hyni në kohën shtesë të ndeshjes me të keqen në këtë vend. Dhe deri tani e keqja kualifikohet, deri tani ju skualifikoheni. Durimi ynë po soset. Kjo do të thotë që SPAK-u dhe të gjithë ata që duan drejtësi në këtë vend, duhet të kujtohen se ne nuk e kemi humbur gojën, e kemi vënë”, tha Rama.

Kryeministri i kujtoi SPAK-ut se nuk ka çuar para drejtësisë asnjë gjykatës e prokuror të korruptuar të nxjerrë jashtë sistemit nga vetingut, gjë që siç tha është nga gjërat e para që do t’i kërkohet Shqipërisë në tryezën e negociatave.

“A e dini ju që SPAK ka pasur shpejtësinë e rrufeshme për të vepruar minutë për minutë që të bllokojë Ardian Dvoranin, njeriun e vlerësuar nga sekretari i shtetit si një nga kampionët në luftën ndaj korrupsionit, që të mos hynte në proces si gjykatës. Sa gjykatës e prokurorë të nxjerrë jashtë për pasuri të pajustifikueshme do ishin sot në burg? Ku janë ata sot? Me ca merren? Janë në punën e tyre. Asnjë gjemb në këmbë nuk i ka hyrë”, tha Rama.

LEXONI GJITHASHTU:

• Rama thirrje SPAK: Zgjohuni, një ‘non grata’ na bën karshillëk
• Rama: E gjithë Shqipëria mezi pret ta shohë para SPAK-ut Ilir Metën