Të numërohet aty ku votohet, KQZ kërkon që kutitë të hapen nëpër QV

Kreu i KQZ, Ilirjan Celibashi gjatë raportimit në Komisionin e Ligjeve kërkoi nga ligjvënësit që në ndryshimet e radhës të kodit zgjedhor të konsiderohet mundësia që numërimi i votave dhe nxjerrja e rezultatit të bëhet në qendrat e votimit, siç ka qenë përpara vitit 2001.

Kjo sipas Celibashit, është e mundur të implementohet tani që janë bërë disa përmirësime në lidhje me sigurinë e procesit.

“Ka nevojë për t’u rikonsideruar dhe procedurat e numërimit dhe nxjerrjes së rezultatit të votimit. Mundet të konsiderohet edhe varianti i numërimit dhe nxjerrjes së rezultatit në qendrat e votimit, tashmë që kemi disa përmirësime në lidhje me sigurinë e procesit”, tha Celibashi.

Veç të tjerash Celibashi parashtroi edhe nevojën e qartësimit dhe përmirësimit të rregullave të financimit të partive politike dhe përdorimin e aseteve publike në fushatë, përfshi këtu administratën.

Sipas kreut të KQZ, në zgjedhjet e ardhshme do të jetë e nevojshme shtrirja në njësi të tjera e votimit dhe numërimit elektronik.

LEXONI GJITHASHTU:

• Votimi nga jashtë vendit mundësohet në vjeshtën e 2023-shit, thotë Celibashi
• Celibashi: Nuk ka reflektim nga partitë politike për reformën zgjedhore