‘Fëmija u vra në breg të detit’, deputeti i PD-së tregon për tragjedinë në Himarë

Deputeti i Partisë Demokratike, Kreshnik Çollaku deklaroi se ngjarja e djeshme në plazhin e Potamit në Himarë, ku një 7-vjeçare u përplas për vdekje nga një mjet lundures, ishte shumë e rëndë, teksa vetë ai ndodhej shumë pranë aty.

Për “Euronews Albania”, Çollaku u shpreh se mjeti lundrues ishte shumë i fuqishëm dhe mbërriti në breg të detit, aty ku dhe përplasi fëmijën e mitur duke i shkaktuar vdekjen.

“Ngjan si një film horror. Ndodhesha pranë vendit ku ndodhi ngjarja. Ishte një skaf i fuqishëm, mjet luksi. Mbërri në breg të detit, fëmija ishte një metër larg bregut të detit. Në moment, skafi mori disa njerëz dhe u nis për të shkuar diku tjetër. Në momentin që i dha gaz, helikat copëtuan kokën e 7-vjeçares.

Gomonia mbërriti në breg të detit, unë isha në çadër, isha larg gomones në distance gati më pak se 10 metra. Gomonia mbeti në breg të detit, fëmija u vra në breg të detit, asnjë metër larg bregut të detit në ujë. U bë një skenë horror, e papërshkrueshme”, theksoi ai.

Ngjarja e rëndë në Himarë u shkaktua nga shtetasi Arjan Tase, i cili drejtonte mjetin lundrues.

Ai mbante detyrën Shef Seksioni i Policimit në Komunitet në Komisariatin e Policisë Elbasan dhe pas kësaj ngjarjeje, është përjashtuar nga Drejtori i Përgjithshëm i Policisë së Shtetit, Gledis Nano.

Mbi të është ngritur akuza e vrasjes nga pakujdesia dhe pritet që brenda 48 orësh të njihet edhe më masën e sigurisë në gjykatën e Vlorës.

LEXONI GJITHASHTU

• VIDEO | Manovra të rrezikshme me mjete lundruese në plazhet e Durrësit
• Mjetet lundruese, Ndreu: Kemi hequr patenta të dhëna nën moshë dhe abuzivisht
• Ish-polici Arjan Tase do hetohet për vrasje nga pakujdesia