Abazoviç duhet të dorëhiqet, ish-këshilltari: Tregoi papjekuri politike

Vasel Camaj, ish-këshilltar politik i Dritan Abazoviç tha se kryeministri shqiptar i Malit të Zi ka treguar shumë herë papjekuri politike, pasi nuk ka arritur ta kuptojë realitetin e komplikuar politik në Mal të Zi.

Në një intervistë për Euronews Albania Camaj u shpreh se Abazoviç nuk u bë kryeministër nga vullneti i popullit, po i gjendur rastësisht mes dy grupeve të mëdha politike, pajtimi i të cilëve siç shpjegoi ka qenë gjithmonë i vështirë.

“Ai e ka humbur ndjesinë për politikë reale, kam qenë këshilltar i tij dhe jam munduar t’i tregoj se mali i zi është larg kozmopolizmit që ai pretendonte. Qëllimet i ka pasur të mira, por është treguar politikisht  papjekuri për të realizuar disa projekte që do ta çonin Malin e Zi përpara”, tha Camaj.

Ai tha se Abazoviç po tregon dobësi dhe papjekuri politike duke mos dhënë dorëheqjen, duke i hapur rrugë një qeverie të re.

“Edhe këtë që po bën në Parlamentin e Malit të Zi duke e ditur që 90 për qind e deputetëve ja kanë shprehur mosbesimin dhe nuk jep dorëheqjen është dobësi e tij personale. Për mua do të ishte më e mira zgjedhjet e reja; një qeveri teknike me përfaqësues të të gjithë spektrit të përgatisin terrenin për zgjedhje të lira në Mal të Zi”, u shpreh Camaj.

LEXONI GJITHASHTU:

• ‘Ju shqetëson fakti që jam shqiptar’, Abazoviç u drejtohet deputetëve në Malin e Zi