Transformimi i pabesueshëm, i riu tregon si humbi 40 kg brenda vitit

Nuk janë dy djem të ndryshëm. Është Denis Miti, 40 kg më pak në peshë.

“Çdo gjë nisi duke parë videot e njerëzve që kishin bërë transformime, aty thashë që dhe unë me peshën që kisha mund ta arrija. Fillova duke studiuar pjesën e ushqimeve online; proteinat, karbohidratet, derisa arrita të mblidhja dhe dieta të ndryshme. Duke u testuar më dha rezultatin më të mirë, unë zgjodha sallatat dhe perimet”, tregon Denisi.

27-vjeçari thotë se kishte gati 10 vite që vazhdonte të fitonte peshë. Vitet e fundit kishin filluar dhe problemet shëndetësore.

“Kur nisa palestrën isha diku tek 114 kg, ndërsa tani jam 74 kg. Muajt e parë ishin më të vështirë. Duke e parë veten që kisha arritur një masë të madhe. Nisën edhe problemet shëndetësorë duke filluar tek fundi i shpinës, dhimbje koke, sepse yndyrat i kisha shumë të larta. Në kohën e karantinës mora diku tek 10 kg”, thotë 27-vjeçari.

Denisi tregon se një ndihmë e madh ka qenë dhe nisja e aktivitetit fizik si dhe regjimi i duhur ushqimor.

“Ushqimet që haja më shumë kanë qenë byreku, makaronat, ëmbëlsira, ose dhe ushqime fast food. Tani mundohem të mbaj sa më shumë regjimin ushqimor. Më përpara nuk kam pasur asnjë lloj aktiviteti, tani është palestra që shkoj me qejfin tim më të madh”, shprehet Denisi.

Shtimi në peshë është një ndër problemet me të cilat po haset shoqëria jonë.

LEXONI GJITHASHTU:

• Obeziteti vret 1,2 milionë europianë në vit, thotë OBSH
• Obeziteti prek 16% të fëmijëve deri në 5 vjeç, sipas Ministrisë së Shëndetësisë