PD 3 nisma për dekomunistizimin, çfarë pritet këtë sesion parlamentar

Kjo e hënë çel zyrtarisht sesionin e ri parlamentar në Kuvendin e Shqipërisë. Seanca plenare do të zhvillohet në orën 18:00

Seanca e parë pritet të zgjasë vetëm pak minuta pasi në rendin e ditës është miratimi i programit të punës dhe kalendari i punimeve për 3 javët në vijim.

Konferenca e Kryetarëve vendosi që të përfshi në kalendarin e punimeve të kuvendit, 3 nisma ligjore të Partisë Demokratike që lidhen me dekomunistizimin.

Kjo forcë politike kërkon kthimin në muze kombëtar të burgut të Spaçit dhe kampit të Tepelenës.

Po ashtu, kërkohet deklasifikimi i dosjeve të ish-sigurimit të shtetit dhe nisma e tretë është ajo e dekomunistizimit.

Edhe nismat e Partisë Socialiste të depozituara në fund të korrikut, që kanë të bëjnë me ndryshime në ligjin e dosjeve të vitit 2015 dhe kodin zgjedhor janë bërë pjesë e kalendarit të punimeve.

Në këtë sesion do të vijojë puna edhe për verifikimin e mandatit të deputetes Olta Xhaçka, e cila akuzohet nga opozita se ka shkelur kushtetutën duke e akuzuar si përfituese nga pasuritë shtetërore përmes bashkëshortit të saj biznesmen Artan Gaçi, i cili u shpall investitor strategjik nga qeveria.

Për herë të parë pas pandemisë, në Parlament rikthehet votimi elektronik. Konferenca e Kryetarëve shfuqizoi vendimet e mëparshme për zbatimin e masave për mbrojtjen nga pandemia e COVID-19.

LEXONI GJITHASHTU:

• Rezoluta e kuvendit nxit SPAK-un për çështjet me interes publik
• Marrëveshja për Portin e ri turistik të Durrësit do të dërgohet për votim në Kuvend