Kandidatja për Rektore e UT-së Kozeta Sevrani: Në 4 vite u shpenzua energji vetëm në luftë mes autoriteteve

Prof. Dr. Kozeta Sevrani, e cila kandidon për postin e Rektorit të Universitetit të Tiranës, përcolli për Euronews Albania platformën e saj për drejtimin e mundshëm të universitetit.

Me moton “Vizion dhe integritet për Universitetin e Tiranës me Universitetin e Tiranës”, Sevrani tha se platforma e saj mbështetet në 8 pika: Mirëqeverisja, infrastruktura, rishikimi i programeve të studimit, ndërkombëtarizimi dhe digjitalizimi i UT-së, rritja e cilësisë së mësimdhënies, mundësimi dhe promovimi i jetës ekstrakurrikulare për studentët, transparenca dhe mundësia e gjetjes së burimeve të tjera të financimit.

“Qeverisja e UT-së është kryesore pasi universiteti ka vuajtur luftë të pashembullt mes autoriteteve drejtuese e cila ka ndikuar në mbarëvajtjen e punëve të universitetit. Për fat të keq 4 vitet e kaluara kanë qenë vetëm duke shpenzuar energji në luftën mes autoriteteve, rektorit, senatit, bordit të administrimit dhe administratorit ndërkohë që këto energji mund të ishin kanalizuar dhe profilizuar në rritjen e cilësisë së mësimit dhe ngritjen e kërkimit shkencor aq të domosdoshëm për UT-në,” – u shpreh Sevrani.

Gazetarja Bruna Çifligu e pyeti pedagogen Sevrani për procesin e zgjedhjeve, ku pasur kundërshti për mbajtjen e tyre dhe ato bëhen në gjendje pandemie.

Ajo tha se gjatë fushatës kishte vërejtur mungesë të studentëve dhe për këtë u bëri thirrje që më 30 korrik të marrin pjesë në votim.

Prof. Dr. Kozeta Sevrani është pedagoge e Informatikës dhe e Sistemeve të Informacionit të Menaxhimit në Fakultetin Ekonomik.

Në garën për postin e Rektorit të UT-së, kandidojnë Mimoza Hafizi dhe Artan Hoxha.

Lexoni gjithashtu:

Zgjedhjet në universitet, Mimoza Hafizi: Duhet qeverisje tjetër për t’i dhënë fund frymës destruktive

Lëvizja për Universitetin: Zgjedhjet më 30 korrik të turpshme, pa studentët në auditorë janë farsë

Zgjedhjet në universitete, Shahini: Roli im minimal, datën e propozuan rektorët

Zgjedhjet në universitete, kërkohet rritje e peshës së votës së studentëve nga 10% në 30%