Berisha e konfirmon: Këlliçi ka shprehur dëshirën për të kandiduar përballë Veliajt

Kryetari i Partisë Demokratike, Sali Berisha ka konfirmuar lajmin se deputeti demokrat, Belind Këlliçi synon të garojë përballë kryebashkiakut të Tiranës, Erion Veliaj.

Gjatë një konference të përbashkët për shtyp me kreun e Partisë së Lirisë, Ilir Meta, Berisha nënvizoi se kandidati duhet të dalë përmes procesit të primareve.

“Siç e dini, kandidati për qytetar të parë të Tiranës dhe të gjithë Shqipërisë, do të dalin nga primaret. Unë përgëzoj të gjithë ata, që vendosin të provohen në një garë të pashembullt ndonjëherë në historinë e këtij vendit, që synon t’i japë fund kryetarokracisë. Zoti Këlliçi ka shprehur dëshirën, është njëri nga ata që ka shprehur dëshirën dhe unë e përgëzoj plotësisht.

Sikundër përgëzoj secilin personalitet të partisë ose të Shoqërisë Civile, që vendos të provohet në garë për qytetar të parë të Tiranës apo funksione të tjera”, theksoi kryedemokrati.

Burime për Euronews Albania bënë me dije se Belind Këlliçi është gati të shpalosë kandidaturën për kreun e Bashkisë së Tiranës. Këlliçi pritet të dorëzojë kandidaturën pasdite e sotme.

Ndërsa, mesditën e sotme, Meta dhe Berisha firmosën marrëveshjen për zgjedhjeve vendore të 14 majit të vitit të ardhshëm.

Në dokumentin e siguruar nga Euronews Albania, Meta dhe Berisha dakordësohen në 6 pika, midis të tjera nënvizohet se në zgjedhje do të hyjnë me kandidatë të përbashkët.

Po kështu, Këshillat Bashkiakë, si institucionet më të rëndësishme të përfaqësimit të qytetarëve, do të drejtohen nga përfaqësues të propozuar nga Partia e Lirisë.

LEXONI GJITHASHTU

• Berisha: Marrëveshjet që kam nënshkruar unë sollën fitore, Basha vetëm humbje

• Ekskluzive | Belind Këlliçi kandidati i PD dhe PL për Tiranën

• Berisha: Veliaj duhet të ishte në burg, jo të kandidonte për Tiranën