Biden mesazh Begajt: SHBA dhe Shqipëria, krah për krah në OKB kundër agresionit rus

Presidenti i Shteteve të Bashkuara, Joe Biden i ka dërguar një mesazh falenderimi dhe mirënjohjeje homologut shqiptar, Bajram Begaj për Shqipërinë dhe popullin shqiptar për bashkëpunimin e fuqishëm në avancimin e marrëdhënieve dypalëshe, stabilitetin rajonal dhe sigurinë globale.

“Si aleatë të NATO-s, kemi punuar së bashku për të mbrojtur lirinë dhe demokracinë në të gjithë botën. Përballë agresionit rus kundër Ukrainës, kemi qëndruar krah për krah në Këshillin e Sigurimit të Kombeve të Bashkuara dhe kemi bashkëpunuar për rezoluta të lidhura me luftën e padrejtë dhe të paprovokuar të Rusisë si dhe për adresimin e sfidave të tjera globale”, shprehet Presidenti Biden në mesazhin e tij.

Presidenti Biden vlerësoi ndihmën bujare të Shqipërisë për strehimin e refugjatëve ukrainas dhe afganë, si kontribut për një botë më të sigurt.

“SHBA mbetet e përkushtuar për ta ndihmuar në mënyrë domethënëse dhe të vazhdueshme Shqipërinë në forcimin e mbrojtjes kibernetike, përfshirë mbështetjen financiare dhe ngritjen e një grupi pune për sigurinë kibernetike”, theksohet në mesazh.

LEXONI GJITHASHTU

• Rama me ambasadoren e SHBA në OKB: Moment i rëndësishëm në kuadrin e bashkëpunimit
• “Çfarë na tha Kim”, Balla: SPAK të fillojë hetimet për financimet ruse në PD
• Balla: Berishës dhe Metës s’duhet t’i shkojë askush nga mbrapa, duan destabilizim