SHBA e përçarë, kontrolli i institucioneve ende i paqartë pas zgjedhjeve

Kontrolli i Kongresit amerikan është ende i paqartë. Ndërkohë, cilado parti që do fitojë dy nga tre shtetet e mbetura, Arizona, Xhorxhia dhe Nevada, do kontrollojë Senatin.

Rezultatet nga Arizona dhe Nevada mund të dalin të premten, ndërsa gara e ngushtë në Xhorxhia, ku asnjë kandidat nuk ka siguruar mbi 50% të votave do të thotë se mund të shkojë në balotazh në dhjetor.

Pavarësisht se demokratët do të humbin kontrollin e Dhomës së Përfaqësuesve, humbja nuk ishte aq e hidhur për Joe Biden, i cili uroi demokratët që dolën fitues. “Demokracia fitoi”, tha ai.

“Demokracia jonë është vënë në provë në vitet e fundit, por me votën e tyre amerikanët folën qartë dhe provuan se demokracia është ajo që jemi”, tha ai.

Ndërsa demokratët ndihen të lehtësuar pas performancës së tyre, republikanët vazhdojnë të mendojnë se mund të kishin dalë më mirë. Donald Trump ishte mes tyre kur disa nga të preferuarit e tij dështuan.

Në rrjetet sociale ai shkroi: “Ndërsa në disa aspekte zgjedhjet ishin disi zhgënjyese,  nga këndvështrimi im ato ishin një fitore e madhe”.

Në pritje të rezultatit përfundimtar, të dyja palët duket se kanë shumë për të fituar dhe për të humbur. Por një gjë mbetet e qartë, politika amerikane mbetet më e përçarë se kurrë.

LEXONI GJITHASHTU

• Biden synon të kandidojë për një mandat të dytë presidencial
• ‘Vala e kuqe nuk ndodhi’, Biden i drejtohet popullit amerikan
• Zgjedhjet e mesmandatit në SHBA, republikanët nuk arrijnë pritshmëritë