Deputeti Likaj: Pjesa më e madhe e Grupit Parlamentar ishte në protestë

Deputeti i Partisë Demokratike, Ramadan Likaj thotë se pjesa më e madhe e Grupit Parlamentar të kësaj force politike, ishte e pranishme në protestë.

Në emisionin “Review” në Euronews Albania, Likaj u shpreh se nuk ka pasur asnjë ndërhyrje nga askush, për të marrë pjesë në protestën e sotme.

“Ne nuk kemi pasur dhe nuk kemi asnjë ndërhyrje nga askush. Ne jemi aty dhe mbështesim demokratët, sigurisht që ne jemi përfaqësues të atyre demorkatëve. Kjo protestë e sotme, i ka tejkaluar të gjitha pritshmëritë.

Partia Demokratike ka problemet e veta, por po punojmë çdo ditë, që demokratët të bëhen bashkë dhe pse jo, në zgjedhjet e ardhshem të pushtetit lokal, t’i japim qytetarëve ndryshimin. Aty ka qenë pjesa më e madhe e kolegëve, jam i sigurt për këtë pjesë, protesta ishte shumë e madhe”, theksoi ai.

Pas më shumë se dy orësh, përfundoi protesta kombëtare e opozitës. Në protestë pati 20 folës, ndër to kryedemokrati, Sali Berisha dhe kreu i Partisë së Lirisë, Ilir Meta.

Të dy liderët, hodhën akuza në drejtim të kryeministrit Edi Rama, për shpopullimin e vendit, situatën ekonomike dhe korrupsionin.

Protesta, pas përfundimit të saj, u shoqërua me incidente. Gjithçka filloi pasi Berisha mbaroi fjalën e tij dhe protestuesve iu bë thirrje për të ndezur qirinj në shkallët e Kryeministrisë, në nder të personave që kanë humbur jetën në përplasjet me policinë.

Protestuesit çanë kordonin e policisë dhe hynë në oborrin e Kryeministrisë, ku hodhën bojë në dyert dhe dritaret e godinës.

LEXONI GJITHASHTU

• ‘Protestë masive’, Korreshi: Të mos i zhgënjejmë demokratët me problemet në parti
• Balliu tegon emrin e ish-ministrit: Rama i ka bërë letrat për në SPAK
• Incidenti në fund të protestës, Balliu: Donim të jepnim një mesazh duke ndezur qiri