Balla-opozitës: Nuk fitoni as në 2029-n nëse nis projekti për Portin e Durrësit

Kryetari i Grupit Parlamentar të Partisë Socialiste, Taulant Balla deklaroi se opozita nuk do të fitojë as zgjedhjet e përgjithshme në vitin 2029, nëse nis zbatimi për projektin për Portin e ri turistik të Durrësit.

Duke iu drejtuar deputetëve opozitarë në Kuvend, Balla u shpreh se ‘non gratat’, duke iu referuar kryedemokratit Sali Berisha, nuk mund të blejnë prona në këto projekt, pasi janë të përjashtuar në kontratë.

“Duhet të kuptoni që, arsyeja pse ju jeni bërë lukuni për të sulmuar këtë projekt, është që vëllezërit e Saliut, ‘non gratat’, kolegët e Saliut janë përzënë, është vënë rrjetë dhe nuk mund të penetrojnë. As Zeni, as Saliu nuk mund të blejë pronë këtu sepse nuk e lejon kontrata.

Asnjë ‘non grata’ nuk mund t’i afrohet këtij projekti. Prandaj është nxehur Saliu. Ju dëgjova në mëngjes teksa flisni me njëri-tjetrin. E keni të qartë, po filloi projekti i Durrësit, ju nuk fitoni më as në Durrës, as në Shqipëri, as në 2029-n”, theksoi ai.

Disa ditë më parë, Partia Demokratike depozitoi në Gjykatën Kushtetuese marrëveshjen e Portit të Durrësit, të nënshkruar nga qeveria, por ende të pamiratuar në Kuvend.

LEXONI GJITHASHTU

• VIDEO | ‘Je një hajdut’, Agron Shehaj përplaset me Damian Gjiknurin në Kuvend
• Berisha bllokon foltoren, paralajmëron protestën e radhës. Alibeaj: Opozitë pazaresh
• Debati për integrimin evropian, Tabaku akuza Xhaçkës: Qeveri pasive