Art me hekur, 23-vjeçari përdor mbetjet metalike për të ndërtuar vepra arti

Në përgjithësi, shumica e njerëzve mbetjet metalike i hedhin ose i çojnë për skrap, ndërsa Ozbek Ajvaz i sheh si mundësi për të bërë art dhe për të ruajtuar ambientin.

23 vjeçari nga Shkupi ka prodhuar disa vepra artistike duke përdorur mbetjet metalike. Përmes materialit hekur, ai mundohet ti japë artit një dimension tjetër.

“Mundohem të mbaj pastër ambientin nga hekurishtet dhe t’i japë jetë sendeve të vjetra prej çeliku”- artisti Ozbek Ajvaz.

Për të bërë art, ai frymëzohet shpesh nga procese jetësore të njeriut.

“Këtë portret e kam bërë duke u frymëzuar nga periudha e virozave, kur të gjithë figurativisht thonë kemi hundën si çezmë uji”- shton ai.

“Ky është ai syri që kemi në dyert e shtëpive, ky kubi këtu e simbolizon atë”- nënvizon ai.

Ozbek tregon se përfitimet janë të pakta, pasi materialet bazë për të krijuar një vepër janë shtrenjtuar. Për ta ngritur punën në një tjetër nivel I nevojiten disa makineri të sofistikuara.

“Më parë bëja vepra arti me pak para por tani kushton shumë për shkak të shtrenjtimit të të gjithë materialeve të punës. Fqinjët më shohin duke punuar në atelien time dhe më sjellin pjesë të ndryshme hekuri që nuk u duhen. Pjesa më e madhe e ndihmës më vjen nga personat e afërt, miqtë e adhuruesit e artit”- shprehet ai.

Edhe pse shpirtërisht e plotëson, financiarisht tashmë është bërë e pamundur të mbijetosh nga ky profesion.

“Shumicën e rasteve veprat më duhet ti shes sipas peshës, e jo sipas vlerës artistike, vetëm që të nxjerrë pjesën që kam shpenzuar”- thotë i riu.

23-vjeçari shpreson se kompanitë e mëdha do të vendosin që një ditë të investojnë në talentin e tij për ti bërë vetëm mirë ambientin dhe pasionit të tij.

LEXONI GJITHASHTU: 

• Çollaku për protestën e 6 dhjetorit: Gafë e rëndë diplomatike e dhuratë për Ramën
• ‘Duhet t’i nënshtroheni shumicës’, Beqiri debat me Kullurin për Portin e Durrësit