Harta e Kosovës me ngjyrat e Serbisë, presidenti i FFK: Provokim i politikës serbe

Presidenti i Federatës së Futbollit në Kosovë, Agim Ademi e ka cilësuar si një provokim politik, shfaqjen e hartës së Kosovës me ngjyrat e flamurit të Serbisë, në dhomat e zhveshjes së përfaqësueses serbe në Katar.

Në një intervistë për Euronews Albania, Ademi u shpreh se kjo ishte një akt i shëmtuar.

“Është një akt i shëmtuar dhe një provokim i radhës që dinë ta bëjnë serbët. Nuk e kam pritur që do të ndodhte në lokalet zyrtare të zhveshjes, kjo nuk është dashur që të ndodhë.

Mund ta kishim kuptuar në publik me ultras që kanë ndodhur në shumë raste, por ky provokim puro politik të ndodhë në sport, ku rregullorja e UEFA-s dhe FIFA-s nuk lejojnë përzierjen e politikës në sport dhe të ndodhë në objekte zyrtare, kjo ka qenë shokuese për ne dhe nuk e kemi menduar që dikush mund ta ketë bërë këtë”, theksoi ai.

Federata Botërore e Futbollit (FIFA) ka njoftuar të shtunën se ka nisur masa disiplinore ndaj Federatës Serbe të Futbollit për varjen e një flamuri me përmbajtje politike në raport me Kosovën në dhomat e zhveshjes përpara se të luante të enjten me Brazilin në Kupën e Botës në Katar.

“Komiteti Disiplinor i FIFA-s ka hapur procedurat kundër Federatës së Futbollit të Serbisë për shkak të një flamuri të shfaqur në dhomën e tyre të zhveshjes me rastin e ndeshjes Brazil – Serbi”, thuhet në një deklaratë.

LEXONI GJITHASHTU

• Harta e Kosovës, FIFA nis procedurë disiplinore ndaj përfaqësueses së Serbisë
• Futbollistët serbë shfaqin hartën e Kosovës me ngjyrat e flamurit të Serbisë
• Lëndohet Neymar, frikë te Brazili