Samiti i BE-së do të eklipsojë Ballkanin e Hapur, thotë gazetari Çipa

Gazetari Aleksandër Çipa thotë samiti i Bashkimit Evropian me vendet e Ballkanit Perëndimor që pritet të mbahet sot në Tiranë, do të eklipsojë procesin e Ballkanit të Hapur.

Në një intervistë për “Good Morning Albanians” në Euronews Albania, Çipa u shpreh se samiti ka një rëndësi strategjike.

“Ballkani i Hapur e ka bjerrur rëndësinë dhe peshën specifike pas kësaj që po ndodh. Samiti është diçka shumë më eklipsuese, edhe nga pikëpamja e përmbajtjes, edhe nga përmabjtja e ecurisë së mëtejshme të projekteve.

Është një mega projekt, i cili pashmangshmërisht që do ta sfumonte. Jo vetëm e ka eklipsuar, por e ka sfumuar plotësisht”, theksoi ai.

Këtë të martë, më 6 dhjetor në Tiranë do të zhvillohet samiti i Bashkimit Evropian me vendet e Ballkanit Perëndimor.

Në këtë samit, do të jenë të pranishëm 27 liderë evropianë, shoqëruar nga delegacionet përkatëse.

Ndërkohë, krahas samitit, do të zhvillohet një protestë, e thirrur nga Partia Demokratike. Kreu i kësaj force politike, Sali Berisha ka thënë se protesta do të mbahet në orën 12:00 para Kryeministrisë.

Edhe pse policia nuk ka dhënë leje për protestën brenda perimetrit të sigurisë, Berisha ka deklaruar se populli opozitar do të mbushë rrugët dhe sheshet e Tiranës.

LEXONI GJITHASHTU

• Samiti BE-BP, Çipa: Aleksandër Vuçiç po bën një lojë diplomatike
• Shtohen forcat e policisë në Bulevard, rreth 1500 efektivë për samitin e BE-së
• Samit dhe protestë, sot Tirana e ‘blinduar’