Zëdhënësi i Policisë: Pas Shkodrës, po verifikojmë kamerat e instaluara në çdo qytet

Zëdhënësi i Policisë së Shtetit, Gentian Mullaj deklaroi se pas Shkodrës, do të verifikohen kamerat e instaluara në çdo qytet në vend.

Në emisionin “Good Morning Albanians” në Euronews Albania, Mullaj nënvizoi se aktualisht kanë nisur verifikimet dhe po kryhen veprimet hetimore.

Sipas tij, kjo është një strategji, për t’u prerë rrugën krimnelëve, në mënyrë që të mos ketë deskonspirime në operacionet e policisë.

“Drejtori i Përgjithshëm i Policisë së Shtetit u ka kërkuar të gjithë drejtorëve në qarqe, që të evidentojnë në të gjitha qarqet, kamerat që janë pa zot. Tani është parë e arsyeshme. Është një strategji, e para për t’u prerë rrugët personave kriminalë, që të mos marrin informacion për lëvizjet e policisë.

Nuk dihet ende numri i kamerave, jemi kryer veprime hetimore nën drejtimin e Prokurorisë së Shkodrës, veprime të kësaj natyre do të kryhen në të gjithë republikën. Kanë nisur verifikimet”, theksoi ai.

Disa ditë më parë, Policia e Shkodrës çmontoi 21 kamera të vendosura në shtyllat elektrike, në rrugë, për të mbledhur informacion, për qëllime kriminale.

Kamerat e çmontuara ishin vendosur nga persona apo grupe kriminale me qëllim marrjen e informacionit për lëvizjet e policisë.

LEXONI GJITHASHTU

• Kamerat në rrugët e Shkodrës, Berisha: Dëshmia më flagrante e fuqisë së mafias
• Eksperti: Të hetohet ku janë blerë kamerat që vendosën kriminelët në Shkodër
• Policia aksion në Dobraç, çmontohen kamerat e grupeve kriminale