“Vajza ishte shtrirë, gjysmë e pavetëdijshme”, ja si e shpëtuan zjarrfikësit heronj

Mikel Tafa dhe Florjan Sheqeri duhen konsideruar heronj, sepse me punën e tyre si zjarrfikës mundën të shpëtonin jetën e një 23-vjeçareje e cila u bllokua nga flakët dhe ishte gjysmë e pavetëdijshme në momentin kur u gjet.

“Ishte ora 17:30 kur te salla operative erdhi një njoftim për zjarr në një banesë. Jemi nisur menjëherë dhe arritëm për 4 minuta në vendngjarje. Atje po digjej paneli elektrik nga kati i tretë deri në të shtatin. U ndamë në 2 grupe. Me urdhër të komandantit, unë dhe Flori jemi marrë me evakuimin e njerëzve,” – u shpreh Tafa.

Zjarrfikësi tregoi se si në katin e 13-të dëgjuan zërin e një vajze dhe u ulën të kërkonin, pasi fushëpamja ishte zero nga tymi i madh.

Tafa tha se 23-vjeçaren e kishte gjetur mbi krevatin e dhomës së gjumit dhe e vetmja formë se si ajo mund të shpëtonte ishte duke i dhënë aparatin e tij të oksigjenit, veprim që ai e bëri dhe fatmirësisht vajza u shpëtua.

LEXONI GJITHASHTU:

• 40 orë për të arritur në Turqi, zjarrfikësi nga RMV tregon peripecitë
• Merr flakë banesa trekatëshe në Pogradec, zjarrfikësit në vendngjarje