Studentët të pakënaqur me mësimin online, bëjnë gati valixhet për tek familjet e tyre

Studentët ishin përgatitur për të shkuar në fakultet me 2 nëntor, por tashmë një pjesë e tyre kanë bërë gati valixhet për t’u rikthyer në familje. Propozimi i Komitetit Teknik të Ekspertëve për mbylljen e universiteteve dhe kalimin e mësimit vetëm online gjatë nëntorit, i ka merakosur studentët.

“Shumë keq, sidomos për në vitparistët, mora informacion, thanë do u vijë një e-mail me të gjitha të dhënat për të hënën”, shprehet një studente.

“Realisht unë nuk do doja që të kalonte online, megjithatë nëse kjo është më e mira për të gjithë atëherë ok”, thotë një tjetër.

“Nuk është zgjedhje e mirë, po s’ kemi ç’bëjmë”, deklaron një tjetër student për vendimin për shtyjen e hapjes së universiteteve.

“Për mësimin online nuk është se dimë akoma sesi të veprojmë, as vetë pedagogët nuk e dinë, edhe ne akoma nuk jemi ambientuar, po nuk e dimë se çfarë do bëjmë”, deklaron një studente.

“Është shumë e vështirë që të përqendrohesh me mësimin online, se ka edhe shumë probleme të tjera, jo interneti që shpesh herë mund të mos jetë i duhuri për të kapur orët e mësimit, fakti që nuk je në klasë është e pamundur që të marrësh mësimin ashtu si duhet”, shprehu rezervat një student.

Pedagogu i fakultetit ekonomik Mirdaim Axhami në një intervistë për Euronews Albania tha se mësimi online ishte një e papritur, pasi i gjithë stafi pedagogjik ishte përgatitur për rikthimin e pjesshëm në ambientet e universiteteve.

“Në fakt ishte një lajm surprizë, edhe ne nuk e  prisnim. Ishte bërë një punë përgatitore shumë e madhe në të gjitha strukturat e universitetit dhe fakultetit, mendoj se është një vendimmarrje e vonuar”, tha ai.

 “Kalimi  i mësimit online për Universitetet sipas Komitetit teknik të ekspertëve do shoqërohet me mbylljen e konvikteve. Një ditë pas këtij propozimi, rezidenca studentore nuk e ka ende një vendim sesi do veprohet me studentët të cilët e kanë bërë pagesën e konviktit.”

Në të tilla kushte studentët të cilët jetojnë në konvikte mbeten konfuzë. “Ne kemi bërë pagesë një vjeçare, kemi dhe disa muaj më vonë nuk e di si do vazhdojë”, shprehet një studente.

Të gjendur përpara këtij vendimi të papritur Bashkia e Tiranës bën me dije se kanë nisur konsultimet se si do të veprohet me pagesat e studentëve për konviktet.