Shpërndanin lëndë narkotike në Durrës, gjykata lë në burg 7 të arrestuar

Gjykata e Durrësit ka lënë në burg 7 nga 8 të arrestuarit si pjesëtarë të një rrjeti shpërndarësish të lëndëve narkotike gjatë 2 operacioneve policore antidrogë.

Sipas informacioneve të siguruara nga korrespondetja Kloida Gjuzi, vetëm për 24-vjeçaren Kristel Balla gjykata ka vendosur masën e sigurisë “detyrim paraqitje”, ndërsa në burg janë lënë të rinjtë Alban Vela, Amonali Halili, Ergi Curri, Gentian Gonesha, Stivens Bulku, 43-vjeçari Toni Muça, si dhe 48-vjeçari Goni Muça (alias Gentjan Lici, Gentjan Muça, Gentjan Ferra).

Të tetë u arrestuan 2 ditë më parë, pas një hetim 6 mujor për veprimtarinë e shpërndarjes së drograve të forta, në zonën e Sukthit dhe Durrësit.

Goni Muça ishte në rolin e furnitorit me kokainë për të rinjtë, të cilët, pasi e blinin atë, në bashkëpunim me njëri-tjetrin, e shpërndanin në zonën e Sukthit dhe të Durrësit, si dhe në lokalet e natës, në qytetin e Durrësit.

Po ashtu, 48-vjeçari Muça dhe 25-vjeçari Egi Curri, i kishin përshtatur lokalet e tyre me ambiente të posaçme për shpërndarjen e lëndës narkotike.

Në to policia sekuestroi 1 pako me kokainë, 40 doza me kokainë dhe 3 peshore elektronike që shërbenin për peshimin dhe ndarjen e lëndës narkotike në doza të vogla.

Janë sekuestruar gjithashtu 3 automjete, 2 prej tyre luksoze, 96 mijë lekë të reja dhe disa shuma në euro, franga dhe paund, 1 dorezë hekuri dhe 14 aparate celulare.

LEXONI GJITHASHTU:

• Thirrja e pedagogut të Harvardit: Opozita të distancohet nga akuzat për Kim dhe SHBA
• “Linjë politike anti-amerikane në zgjedhje”, Daci: Po sulmojnë SHBA e jo Kim