Interi, finalistja e parë, zikaltrit mposhtën Juventusin

Goli i Di Marko ka mjaftuar që Interi të mbërrijë në fazën finale të kupës së Italisë. Zikaltrit mposhtën me rezultatin 1-0 Juventusin në Meaca, ndërsa tashmë synojnë të fitojnë për herë të 9 trofeun. Skuadra e Simone Inzagit po zhvillon një sezon të mirë, ku krahas kupës po lufton dhe në Ligën e Kampionëve, aty ku do të përballet në gjysmëfinale me Milanin.

Mbrëmjen e së mërkurës përballja ishte deri diku e barabartë me pak raste shënimi, por që zikaltrit rezultuan më të suksesshëm në manovrat e tyre sulmuese. Goli i vetëm i sfidës erdhi në minutën e 15’, aty ku mbrojtësi Di Marko përfitoi nga vendosja jo e mirë e mbrojtjes kundërshtare, mori një pasim të bukur dhe mposhti portierin Perin.

Tentativat e bardhezinjve nuk vlejtën për të ndryshuar fatin e përballjes, duke vulosur rezultatin 1-0, ndërsa përballja e parë në Torino u mbyll në shifrat 1-1. Kjo është hera e 15 që Interi mbërrin në finale të kupës.

Mbrëmjen e së mërkurës zbulohet dhe skuadra e dytë finalist, njëra mes Fiorentinës dhe Kremonezes. Në Artemio Franki, skuadra violë ka avantazhin e përballjes së parë, të luajtur në transfertë ku triumfoi me rezultatin 0-2. Mungersat e Bonaventurës dhe Sirigu nuk pritet të sjellin problem për Fiorentinën, ndërsa në anën tjetër miqtë kërkojnë kualifikimin për në stacionin e fundit.

LEXONI GJITHASHTU:

• Dëshmia e vajzës që zbuloi vrasësit e Nikulaj, si dështuan 3 tentativat e para
• Stoltenberg: Ukraina, në pozitë të mirë për ta çliruar territorin e pushtuar