Luftimet në Sudan, paqja ka pak shanse të arrihet, 500 civilë të vrarë

Palët e përfshira në luftë në Sudan janë të hapura për negociata dhe kanë pranuar se konflikti që ka shpërthyer dy javë më parë nuk mund të vazhdojë më.

Kështu ka deklaruar një zyrtar i OKB-së për agjencinë e lajmeve “Reuters”, i cili ka folur për një fije shprese edhe pse luftimet vazhdojnë.

Volker Perthes, përfaqësuesi i posaçëm i OKB-së në Sudan, tha se palët kanë emëruar përfaqësues për bisedimet, që mund të mbahen në Xhedah të Arabisë Saudite, ose në Xhuba të Sudanit Jugor.

Megjithatë, ai ka vënë në dyshim mundësinë që vetë liderët e fraksioneve luftarake të ulen me njëri-tjetrin.

Për bisedimet nuk është caktuar një datë dhe perspektiva që liderët e dy palëve të negociojnë në mënyrë direkte duket e zbehtë.

Të premten, kreu i ushtrisë, gjenerali Abdel Fattah al Burhan deklaroi në një intervistë se nuk do të ulej në tryezë me liderin rebel të Forcave të Ndërhyrjes së Shpejtë, gjeneralin Mohamed Hamdan Dagalo.

Ky i fundit, nga ana e tij ka deklaruar se do të ulet në dialog vetëm pasi ushtria e rregullt t’i ketë dhënë fund akteve armiqësore.

Rreth 500 persona janë vrarë që prej 15 prillit, kur beteja e gjatë për pushtet mes ushtrisë dhe paraushtarakëve shpërtheu në një konflikt të armatosur.

LEXONI GJITHASHTU:

• Ashpërsohen luftimet në Sudan, disa qindra të vrarë që nga fillimi i konfliktit
• Agjencia e OKB-së paralajmëron se konflikti në Sudan mund të sjellë krizë rajonale
• Blinken: SHBA-ja po punon për zgjatjen e armëpushimit në Sudan