Intensifikohen luftimet në Sudan, OKB: Vendi në krizë humanitare

Luftimet u intensifikuan në kryeqytetin e Sudanit në 24 orët e fundit, me tingujt e të shtënave që u dëgjuan në mbarë Khartumin dhe tymin e zi që ngjitej drejt qiellit.

Dy gjeneralët e përfshirë në konflikt kanë rënë dakord të dërgojnë përfaqësues në negociata, që ka gjasa të mbahen në Arabinë Saudite. Por kjo marrëveshje nuk ka sjellë reduktimin e luftimeve.

Ndërkohë, Programi Botëror për Ushqimin ka shfuqizuar pezullimin e përkohshëm të operacioneve, pasi luftimet mes grupeve të ndryshme ushtarake kanë çuar miliona banorë drejt urisë.

Shpërndarja e ushqimit pritet të rifillojë, por vetëm në ato lokalitete ku aksesi humanitar është i mundur.

Përballë thellimit të krizës humanitare, OKB ka dërguar një nga zyrtarët më të lartë të saj për të koordinuar dhe lehtësuar përpjekjet.

Kriza humanitare është paralajmëruar pasi njerëzve të mbetur të bllokuar nga përleshjet u kanë mbaruar ushqimet dhe uji i pijshëm.

E ndërsa disa mijëra shtetas të huaj janë evakuuar nga vendi, dhjetëra mijëra sudanezë po largohen drejt çdo pike kufitare që mund të arrijnë.

Një eksod i madh po verifikohet në vendet fqinje si Egjipt, Çad dhe Republikën e Afrikës Qendrore, me OKB që thotë se agjencia e saj për emigracionin llogarit mbi 800 mijë persona që kërkojnë siguri.

LEXONI GJITHASHTU:

• Mbi 300.000 të zhvendosur brenda vendit nga konflikti në Sudan
• OKB: Mbi 800.000 njerëz mund të ikin nga Sudani