Vidhte monopatina në Tiranë, arrestohet 20-vjeçari. Çfarë i gjeti policia

Një 20-vjeçar është arrestuar nga policia i Tiranës si autor i dyshuar i vjedhjeve të 7 monopatinave në kryeqytet.

Policia ka proceduar penalisht dhe bashkëpunëtorin e tij një shtetas 16-vjeçar. Nga veprimet hetimore dyshohet se këta shtetas, në bashkëpunim me njëri-tjetrin, gjatë 2 muajve të fundit, kanë vjedhur 7 monopatina, në zona të ndryshme të Tiranës.

Në cilësinë e provës materiale u sekuestruan 2 monopatina të dyshuara të vjedhura.

Vijon puna për zbardhjen e vjedhjeve të tjera që mund të jenë kryer nga këta shtetas.

Materialet procedurale i kaluan Prokurorisë, për veprime të mëtejshme.

“Shërbimet e Komisariatit të Policisë Nr. 1, si rezultat i administrimit të menjëhershëm të denoncimeve të qytetarëve të ndryshëm, për raste të vjedhjes së monopatinave të tyre, me mbështetjen e inteligjencës informative, kanë organizuar dhe finalizuar operacionin policor të koduar “Stop”.

Si rezultat i këtij operacioni, u arrestua në flagrancë shtetasi E. G., 20 vjeç, banues në Tiranë, si dhe u referuan materialet në Prokurori ku nisi procedimi në gjendje të lirë për një të mitur 16-vjeçar”, njofton policia.