A do të ketë sërish zgjedhje në Himarë? Deputeti i PS analizon çështjen Beleri

Deputeti i Partisë Socialiste, Ilir Metaj, ka komentuar gjatë në një intervistë për Euronews Albania arrestimin e kryebashkiakut të zgjedhur të Himarës, Fredi Beleri.

Metaj tha se arrestimi është një çështje e drejtësisë për një akuzë penale për të cilën Beleri ka rënë në përgjime.

“Mos të marrim rolin e dretësisë, pasi drejtësia është mjaftueshëm e drejtë dhe profesionale për të dhënë drejtësi. Po flasim për një abuzim të kryer në kundërshtim me ligjin dhe të kapur në flagrancë. Për të parë nëse drejtësia është e kapur, mjaftojmë të shohim se mjaft zyrtarë të lartë nga radhët e PS janë duke u përballur me ligjin”, tha Metaj.

Pyetjes nëse PS është e gatshme për të shkuar në zgjedhje në Himarë, nëse Beleri nuk betohet dhe nuk merr mandantin, Metaj iu përgjigj duke thënë se Partia Socialiste është një forcë politike e gatshme kurdoherë për të hyrë në beteja elektorale.

“Ne jemi gati në çdo moment për të shkuar në zgjedhje, kudo në Shqipëri, sa herë që është nevoja për t’u përballur me këdo që ka tezat e tij dhe beson tek ajo që është më e mira. Por ne e dimë se çfarë duhet, populli shqiptar e di çfarë duhet, cila është rruga e duhur për zhvillimin ekonomik të këtij vendi, kulturor, social dhe integrimin sa më të shpejtë në BE. Në emër të këtij integrimi dhe të asaj që kemi premtuar, jemi gati kurdo”, përfundoi ai.

LEXONI GJITHASHTU:

• Ekstremisti grek i shpallur non grata në Shqipëri, në krye të protestës për Belerin
• “Ti jepet fund marrëzisë”, kreu i OMONIA për Belerin: Do kërkojmë ndihmën e Greqisë