Euro 2024| Trajneri i Kombëtares: Duhet të luftojmë për një vend në Gjermani

Trajneri i Kombëtares shqiptare, Silvinjo, mbajti këtë të hënë një konferencë për media, ku u ndal tek dy ndeshjet kualifikuese që Shqipëria do të luajë për Euro 2024, kundër Moldavisë dhe Ishujve Faroe.

Në fjalën e tij Silvinjo theksoi se është i kënaqur me punën që po bëhet dhe Shqipëria po lufton për një vend në kampionatin evropian, që do të mbahet në Gjermani. Ai theksoi se gjatë dy ndeshjeve të ardhshme e rëndësishme është që të merren 6 pikë.

“Mundësia për të fituar një ndeshje është dhe përveç lojës së bukur për të marrë 6 pikë, është fusha që na e tregon. Rezultati nuk është diçka që dihet pasi kemi 7 ndeshje të rëndësishme që duhen fituar. Tani kam në mendje vetëm ndeshjen me Moldavinë dhe pastaj do të kem tjetrën. Jam i kënaqur me punën që po bëhet dhe duhet të luftojmë për një vend në Gjermani. Jam i bindur se në debutimin tim në Shqipëri para tifozëve do të bëjmë më të mirën për të marrë 3 pikë dhe tifozët do të na ndihmojnë”, tha Silvinjo.

Gjithashtu ai shtoi: “Mund të them se i njoh më mirë lojtarët. Prej dy muajsh nuk kishim punë të lehtë. Polonia ishte vetëm një ndeshje dhe tani kemi situatë krejt ndryshe me kundërshtarë ndryshe. Jam i kënaqur me listën që ishte me 27 lojtarë por tani kemi 26 nga Gjasula. Jam i kënaqur që kemi të rinj dhe me eksperiencë dhe 2-3 lojtarë të tjerë që do të na ndihmojnë. E njoh skuadrën më mirë se në periudhën që kishim ndeshjen me Poloninë”.

LEXONI GJITHASHTU:

• Ndeshjet e Euro 2024, Kombëtarja humbet mesufushorin kyç
• Neymar drejt Anglisë, 31-vjeçari do largohet nga PSG në verë