Aeroporti në Vjosë-Nartë, aktivisti: 300 ha tokë do shkatërrohen, plane për resorte

“Ndaloni aeroportin!”, kështu do të quhet një film dokumentar i cili tregon përpjekjet e një komuniteti për të ndaluar punimet e aeroportit pranë zonës së Nartës.

Ky film dokumentar del më datë 28 qershor në kinema; pasqyron përmes planeve pasuritë e zonës së mbrojtur si dhe betejën për ta shpëtuar atë. Nga ana tjetër edhe informon mbi argumentet e përdorura deri tani për ndërtimin e aeroportit.

Aktivisti Zydjon Vorpsi në një intervistë për emisionin “Good Morning Albanians” në Euronews Albania, u shpreh se me ndërtimin e aeroportit do të hiqen 300 hektarë tokë.

Më tej, ai nënvizoi se ka plane për resorte dhe, sipas tij, ky është një sulm që po i bëhet natyrës.

“Pavarësisht se sa është propaganduar se është një e mirë publike që i ofrohet popullatës, në fakt nuk ka pasur gjithëpërfshirje dhe një hapësirë për debat. Filmi dokumentar është një orë.

E para, hiqen mbi 300 hektarë tokë që nuk do i shërbejnë më asnjë një njeriu dhe as jetës së egër. Ka plane për resorte në bregun e Nartës. Ky është sulmi më i madh që po i bëhet natyrës shqiptare brenda 30 viteve, pasi po bëhet brenda një zone të mbrojtur”- tha ai.

LEXONI GJITHASHTU:

• Zbulimi: Dieta pa mish ul dëshirën seksuale…
• Nëna nga Fieri me 10 fëmijë: Mbledhim kanaçe dhe hekura në rrugë