“Nxituan të fajësonin Kurtin”, Prençi: Kur foli SHBA-ja, Rama ndryshoi kursin

Ish-drejtori i Policisë së Shtetit, Shemsi Prençi tha në një intervistë për Euronews Albania se politika e Tiranës dhe opozita e Kosovës nxituan të fajësonin Albin Kurtin për reagimin e tij pas tensioneve në raport me Serbinë.

Edhe pse vetë Prençi tha se reagimi i Kurtit s’ishte i duhuri, përsëri e justifikoi këtë të fundit duke thënë se qeveria e Kosovës duhet ta ushtrojë integritetin real në gjithë territorin e Kosovës.

“Pse duhet ne të mbështesim reagimet ekstremiste të serbëve në veri të Kosovës, të cilët janë në të padrejtë? Liderët e opozitës në Kosovë dhe kryeministri i Shqipërisë e bënë diçka të tillë kundër Albinit. I thanë ‘ja ushtro integritetin tani, tani që të grabitën policët’. Ishte veprimi më i turpshëm i politikës shqiptare. Një ditë më vonë, kur Shtetet e Bashkuara, Departamenti i Shtetit u vu në dijeni që marrja peng ishte bërë në territorin e Kosovës, ishte një veprim i paligjshëm i forcave të Serbisë, ishte cenim i drejtpërdrejtë i integritetit territorial të shtetit të ri të Kosovës me pavarësi të brishtë sepse është i monitoruar nga KFOR-i dhe organizma të tjerë ndërkombëtarë, Rama dhe drejtuesit politikë të opozitës në Kosovë filluan të ndryshojnë kursin,” – u shpreh Prençi.

LEXONI GJITHASHTU:

• Situata në Veri të Kosovës, Dauti: Pse Britania është në të njëjtin qëndrim me SHBA
• Si u liruan 3 policët e Kosovës? Avokati: Vuçiç mori urdhra të prerë nga SHBA