Festë dhe gjoba për Krishtlindje në Korçë, qytetarët s’respektojnë asnjë masë

Qindra të rinj, banorë të Korçës dhe të ardhur nga rrethe të tjera për të festuar Krishtlindjet e kaluar fundjavën, janë dyndur në lokalet e qytetit, duke shpërfillur tërësisht distancimin fizik dhe masat anticovid.

Gjatë gjithë pasdites, sheshi i pazarit të Korçës, ka qenë i tejmbushur nga qytetarë që festonin ngjitur me njëri-tjetrin, ndërkohë që maskat nuk ekzistonin fare.

Megjithëse pjesa më e madhe në ambiente të hapura, të rinjtë kanë qëndruar pranë dhe në tavolina ngjitur, duke u kthyer në një rrezik potencial për shpërndarjen e virusit. 

Festimet kanë vazhduar deri kur ka filluar ora policore, kohë kur lokalet janë mbyllur.

Por, kjo situatë nuk ka kaluar pa u ndëshkuar, pasi tre lokale janë gjobitur deri në 1 milion lekë të reja, pasi nuk kanë zbatuar protokollet anticovid dhe kanë organizuar festa në ambientet e brendshme.