Kampioni i boksit: S’kam humbur asnjë ndeshje në Amerikë, stërvitem 5 orë në ditë

Ermal Hadribeaj është boksier profesionist. Prej 5 vitesh ai është zhvendosur nga Tirana dhe jeton e punon në Miami Beach, aty ku sërvitet çdo ditë nga 5 orë.

Ai tregoi në një intervistë për “Good morning Albanians” në Euronews Albania se deri më sot nuk ka humbur asnjë ndeshje në Amerikë, ndërsa shtoi se për një arritje të tillë i është dashur shumë punë dhe përkushtim.

“Unë faktikisht në fillimet e mi ka qenë e vështirë, 5 ndeshjet e para, por me eksperiencë e di kur duhet të ha më pak, kur duhet të ndaloj brumin, kur duhet të ha perime, proteina. Duhet të jetë e strukturuar sepse në momentin që ti peshohesh dhe s’ke mbajtur një dietë të rregullt, më pas është torturë. Dedikimi është shumë i lartë, stërvitja ime ditore shkon 5 orë. Duket shumë, por koha kalon aq shpejt sa ti nuk e kupton. Mundohem të fle shumë gjumë që të jem në fokus,” – u shpreh boksieri.

29-vjeçari është kampion i titullit WBC Internacional, WBC Mediterranean dhe WBC North America.

Më 27 korrik, ditën e enjte ndeshet te sheshi “Nënë Tereza” për mbrojtjen e titullit WBC International, të cilin e fitoi edhe në Dubai vitin e kaluar.

Hadribeaj ka shumë kohë që po përgatitet për këtë ndeshje, për të cilën duket të jetë jo vetëm në peshën dhe në formën e duhur fizike por edhe në atë mendore.

Ai njihet edhe me nofkën “Albanian Sniper”.

LEXONI GJITHASHTU:

• Boksieri Kristian Prenga nderohet në SHBA, i dorëzohet çmimi ‘çelësi i qytetit’
• Bëri për spital 36-vjeçarin grek, vetë-dorëzohet në polici boksieri shqiptar