Pasiguri politike në Spanjë, partitë kryesore refuzojnë koalicionin

Spanja ka hyrë në një periudhë pasigurie teksa dy partitë kryesore të vendit kanë lënë të kuptohet se shpresojnë ta marrin pushtetin në rrugë individuale, pavarësisht se asnjë prej tyre nuk ka shumicën e duhur.

Partia Popullore e krahut të djathtë, e drejtuar nga Alberto Nunjez Feiho, fitoi shumicën e vendeve në Parlament, por nuk arriti mazhorancën. Megjithatë, Nunjez ka deklaruar se do të eksplorojë të gjitha mënyrat për të formuar qeverinë.

Ndërkohë, kryeministri socialist Pedro Sanchez, i cili performoi më mirë nga sa pritej në zgjedhjet e së dielës, ka përjashtuar mbajtjen e zgjedhjeve të tjera duke thënë se, demokracia mund të gjejë një formulë për të formuar qeverinë.

Ai mund të përpiqet të lidhet me partinë pro-pavarësisë “Bashkë për Katalonjën”, por lideri i saj, Karl Puzhdëmont, që jeton në mërgim në Belgjikë që prej përpjekjeve të dështuara për pavarësi në 2017-n, më herët e ka përjashtuar një bashkëpunim të tillë.

Parlamenti i ri i Spanjës do të mblidhet pas një muaji. Në bazë të procedurës zyrtare, mbreti Felipe i Gjashtë pritet të ftojë një nga krerët e partive për të formuar qeverinë.

LEXONI GJITHASHTU: 

• Fier/ Një tjetër vatër zjarri në zonën e Kreshpanit dhe në Ndërnenas
• Greqia në luftë me flakët, Mitsotakis: Ditë të vështira na presin, BE premton ndihmë