Stuhi e zjarre në Itali, gazetarja: 3 hotele luksoze në flakë, Siçilia po evakuohet

Moti i keq ka përfshirë edhe Italinë, nga Lombardia te Siçilia ku një pjesë e shtetit përballet me zjarret ndërsa pjesa tjetër me pasojat e stuhive.

Gazetarja Alba Kepi tha në një intervistë për Euronews Albania se banorët në Siçili janë pa energji elektrike dhe vijojnë të evakuohen.

“Në fakt prej 2022-shit Italia regjistronte një situatë të pazakontë. Nëse në mesataren europiane kemi 114 viktima për shkak të motit të nxehtë në çdo 1 milion banorë, Italia regjistron 295 viktima për mot të nxehtë në çdo 1 milion banorë. Nëse në të gjithë territorin europian kemi një nxehje të tokës, në Itali kjo nxehje e tokës është 2 gradë e gjysmë më shumë se mesatarja europiane. Pra, janë disa sinjale që tregojnë sipas ekspertëve, se Italia është e vonuar,” – u shpreh Kepi.

Gazetarja theksoi se ka qëndrime të ndryshme që thonë se disa prej fenomeneve që po ndodhin as nuk mund të parashikohen, as nuk mund të parandalohen deri në momentin që ndodhin.

“Në orët e fundit kemi marrjen flakë të tre hoteleve luksoze, evakuimin e mbi 2 mijë pushuesve. Pra janë disa fenomene të cilat në një farë mënyre justifikohen me atë që është ngrohje globale. Nga ana tjetër, ndoshta Italia vazhdon të jetë e vonuar në atë që quhet si strategjia e parandalimit të fenomeneve klimatike,” – u shpreh Kepi.

Të paktën 6 persona raportohet se kanë humbur jetën për shkak të motit ekstrem. Pritet që në 5 rajone të shpallet gjendja e jashtëzakonshme.

LEXONI GJITHASHTU:

• Pas zjarrit, Italia mbyll aeroportin kryesor të Siçilisë
• Skema mashtrimi dhe kompani të rreme, 3 shqiptarë e 3 italianë nën hetim