Rrezikoi jetën pasi gomonia iu përmbyt në mes të detit, shpëtohet turisti

Një turist është shpëtuar nga mbytja paraditen e kësaj të hëne pasi ju përmbyt gomonia në mes të detit në Sarandë.

Ngjarja ka ndodhur në Sarandë në plazhin e Kasolles, ku për fat të mirë Policia Kufitare i është përgjigjur në kohë rekord, thirrjes së tij për ndihmë.

“Paraditen e sotme, një shtetas ka telefonuar në sallën operative të Komisariatit të Policisë  Sarandë, për të kërkuar ndihmë pasi rrezikonte të mbytej sepse mjeti lundrues gomone që drejtonte, ishte përmbysur në plazhin e Kasolles.

Menjëherë pas telefonatës, shërbimet e Policisë Kufitare janë nisur me mjet lundrues në drejtim të kësaj adrese dhe pas disa minutash kërkime kanë lokalizuar shtetasin që po kërkonte ndihmë dhe gomonen që ishte përmbysur.

Shërbimet e Policisë Kufitare e kanë marrë këtë shtetas, në mjetin e tyre lundrues, dhe i kanë dhënë ndihmën e parë. Gjithashtu, shërbimet e Policisë Kufitare kanë nxjerrë në breg, mjetin e tij lundrues që ishte përmbysur në mes të detit.

Drejtuesi i mjetit lundrues ndodhet jashtë rrezikut për jetën. Ai ka falënderuar shërbimet e Policisë që i erdhën në ndihmë në kohë rekord”,-thueht në njoftimin e policisë.

LEXONI GJITHASHTU:

• Volejbolli “ndez motorët”, vajzat e Skënderbeut synojnë titullin kampion
• Ndryshimet në Qeveri, Bardhi: Makiazh për fytyrën e kalbur nga korrupsioni i Ramës