Deputeti gjerman përplaset me Vuçiç: Vrasja e njerëzve është krim i tmerrshëm

Ish-ministri gjerman për Evropë, Michael Roth, i është kundërpërgjigjur presidentit të Serbisë, Aleksandër Vuçiç, pasi ky i fundit e përmendi në konferencën e tij për media ku foli për grupin terrorist që kreu sulme në Kosovë dhe ku mbeti i vrarë një polic, si dhe u plagosën dy të tjerë.

“I dashur president Vuçiç! Të vrasësh njerëz është krim i tmerrshëm. S’ka rëndësi për mua se prej nga vijnë viktimat dhe kryerësit e veprës. S’më interesojnë nacionalitetet dhe etnitë fare. Së bashku kosovarët dhe serbët meritojnë të jetojnë në paqe, siguri, dinjitet dhe kufij të sigurt”, ka shkruar Roth në përgjigjen e tij ndaj presidentit serb.

Vuçiç, në konferencën për media komentoi deklaratën e deputetit gjerman, i cili tha se bandat serbe me mbështetje direkte nga Beogradi ka shumë gjasë që të jenë përgjegjëse përsëri për vrasjen e policit kosovar.

“Keni mundur të dëgjoni sot se gjithçka erdhi nga Beogradi, se Serbia e bëri gjithë këtë dhe kjo flet mjaft çfarë qëllime kanë nga Roth (deputeti gjerman)  deri te Fhelinger që bëri thirrje për bombardim të Beogradit”, deklaroi Vuçiç.

LEXONI GJITHASHTU:

• Veterani i UÇK-së: Rusia dhe Serbia duan të destabilizojnë Kosovën me këto sulme
• VIDEO| Mesazh mbështetje për Policinë se Kosovës nga “Times Square”