Çekia shpall listën e lojtarëve me Shqipërinë, konfirmohet mungesa e Schick

Çekia do të vijë me disa ndryshime në përballjen ndaj Shqipërisë që luhet më 12 tetor në stadiumin “Air Albania”. Trajneri Silhavy ka publikuar listën e lojtarëve të grumbulluar për këtë ndeshje të rëndësishme për të dyja skuadrat, ndërsa ajo çka konfirmohet është mungesa e sulmuesit Patrick Schick. Ky i fundit prej muajsh vijon të jetë i dëmtuar, ndërsa koha për rikuperimin është e gjatë, ndaj nuk do të luajë përballë kuqezinjve.

Lojtarët kryesorë të ekipit janë thirrur edhe në këtë përballje që vlerësohet maksimalisht për rrugëtimin drejt Euro 2024, mes tyre dhe kapiteni Soucek. Duke u nisur nga katërkëndëshi, portieri Pavlenka pritet që të jetë titullar ndaj kuqezinjve. Reparti i mbrojtjes do t’i besohet katërshes që numëron dhe më tepër minutazh me Brabec, Holes, Coufal e Krejci. Soucek, Kral dhe Cerny pritet që të reshtohen në mesfushë, ndërsa emri i konfirmuar në sulm është ai i Kuchtas, i mbështetur nga dyshja Cvancara-Hlozek.

Çekia renditet në vendin e dytë me 8 pikë, teksa grupi E udhëhiqet nga Shqipëria e cila regjistron 3 fitore, 1 barazim dhe 1 humbje. Kuqezinjtë ende nuk e kanë publikaur listën e lojtarëve të thirrur, por ajo çka pritet është një rikthim i Armando Brojës, ndërsa siç tashmë dihet në diskutim janë dhe Mucolli apo Shabani. Grumbullimi i kuqezinjve do të nisë më 8 tetor.

LEXONI GJITHASHTU:

• Rikthehet Broja, dëmtohen Cikalleshi e Ismajli. Sylvinho vijon survejimet
• Rruga drejt Gjermanisë, Silvinjo rrëfehet në Euronews Albania: Do bëjmë maksimumin