Avokatët kryesisht nuk marrin përsipër mbrojtjen e Berishës, caktohet i radhës

Gjatë seancës së sotme në GJKKO, avokatët kryesisht nuk e morën përsipër mbrojtjen e Berishës.

Për këtë arsye gjykata caktoi si avokate kryesisht Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të ish-kryeministrit nën hetim Sali Berisha.

Ndërkohë ish-kryeministri sipas vendimit të gjykatës duhet të paraqitet dy herë në muaj në Byronë Kombëtare të Hetimit.

Njoftimi i gjykatës

Në datën 26.10.2023, ora 15.00, në Gjykatën e Posaçme të Shkallës së Parë për Korrupsionin dhe Krimin e Organizuar, u riçel seanca gjyqësore për vijimin e shqyrtimit të kërkesës së paraqitur nga Prokuroria e Posaçme, me objekt “Marrjen në pyetje të shtetasit nën hetim Sali Berisha”.

– Të pranishëm në sallën e gjykimit ishin prokurorët Arben Kraja dhe Enkeleda Millona, ndërsa i hetuari Sali Berisha u përfaqësua nga mbrojtësit e caktuar kryesisht nga gjykata, av.Rabije Cenalia dhe av.Jalldiz Kastrati.

– Gjykata bëri me dije se pranë kryesekretarisë së kësaj gjykate, ditën e sotme, datë 26.10.2023, ora 09.45, është depozituar një kërkesë nga shtetasi Sali Berisha, me objekt përjashtimin e gjyqtares nga gjykimi i kësaj çështje. Mbi këtë kërkesë, me vendimin nr.430 Akti, datë 26.10.2023 të GJKKO është vendosur mospranimi i kërkesës së kërkuesit Sali Berisha, me objekt përjashtimin e gjyqtares Irena Gjoka, si të pabazuar në prova dhe në ligj.

– Mbrojtësit e caktuar kryesisht nuk morën përsipër realizimin e  mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av.Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të shtetasit nën hetim Sali Berisha.

LEXONI GJITHASHTU:

• Bllokimi i pasaportës së Berishës, gazetari: Nuk iku në kohën e plumbave, jo më tani
• Kapshticë/ U kap me 30 mijë dollarë të padeklaruar, procedohet 54-vjeçarja