Durrës, gjatë vitit 2023 kanë humbur jetën 5 persona në vendin e punës

Pesë persona kanë humbur jetën në vendin e punës gjatë 9-mujorit të këtij viti në qytetin e Durrësit.

Treguesit statistikorë të aksidenteve në punë, të trajtuara dhe hetuara nga Inspektoriati i Punës, flasin për një rënie me 25%, krahasuar me të njëjtën periudhë të një viti më parë.

“Kemi një rënie me 25% krahasuar me 9-mujorin e vitit 2022. Në vitin 2022, përgjatë 9 muajve kemi 29 raportime dhe inspektime, ndërkohë në 9-mujorin e 2023 kemi në total 23 aksidente apo incidente në punë, ku nga këto, në 2022 4 kanë qenë me pasojë vdekjen, ndërsa në 2023 kemi 5 me pasojë vdekjen,” – u shpreh Bledar Voka, drejtues i ISHPSHS sektori Durrës.

Sipas Vokës, pjesa më e madhe e aksidenteve me pasoja fatale për jetën nuk lidhen drejtpërdrejtë me procesin e punës.

“Rastet që kemi pasur më shumë të vdekur, 1 ka qenë në ndërtim dhe 4 të tjerët kanë qenë aksidente rrugore. Dhe ligji, dhe VKM-ja 788, e përcakton që kur një person, edhe nëse është nisur për në punë, apo duke u kthyer nga puna, ajo kategorizohet si aksident në punë, pavarësisht se ka qenë jashtë detyrave të caktuara,” – u shpreh Voka.

Rastet e incidenteve me pasojë vetëm dëmtimin e punonjësve janë më të shumta, dhe për këtë listën e kryesojnë ndërmarrjet prodhuese.

Qarku i Durrësit ka 13 mijë subjekte të regjistruara, ndërsa Inspektoriati arrin të mbulojë vetëm rreth 1200 inspektime në vit. Prandaj Voka apelon për më shumë fushata ndërgjegjësimi dhe më pak frikë për të raportuar rastet.

LEXONI GJITHASHTU:

• Banorët në Durrës konfliktohen me sende të forta me përfaqësuesit e kishës
• Pemët në Durrës kërcënim për qytetarët, era shkakton rrëzimin e tyre