Dhunoi me shqelma qenin në ashensor, procedohet gruaja në Tiranë

Gera Kulla e cila është filmuar nga kamerat duke qëlluar me shqelma qenin menjëherë pasi mbyllet dera e ashensorit, do të procedohet penalisht.

Pas publikimit të pamjeve, rasti u ndoq deri në fund nga Euronews Albania që vendosi në lëvizje Policinë e Shtetit si dhe bëri të mundur ofrimin e kujdesit për kafshët.

Gera Kulla, është një aktiviste për mbrojtjen e kafshëve, e cila shpesh merr “nën kujdes” kafshë të braktisura, por me sa duket ajo i merr dhe i dhunon ato.

Ky nuk është rasti i parë i bërë publik, për qytetarë që dhunojnë jo vetëm kafshët e tyre, por dhe kafshë në rrugët e qytetit.

Njoftimi i policisë

Në lidhje me një video të postuar në rrjete sociale, në të cilën shfaqet një shtetase duke keqtrajtuar disa kafshë, në një ashensor, ju sqarojmë se:

Shërbimet e Komisariatit të Policisë Nr. 3, menjëherë pas publikimit të pamjeve filmike, organizuan punën për identifikimin dhe vënien përpara përgjegjësisë ligjore të shtetases që shfaqet në video.

Specialistët për Hetimin e Krimeve të Komisariatit të Policisë Nr. 3 kanë identifikuar dhe proceduan penalisht shtetasen G. K., 51 vjeçe, banuese në Tiranë.

Materialet procedurale për këtë rast i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Keqtrajtimi i kafshës”.

Në bashkëpunim me Bashkinë Tiranë, kafshët e keqtrajtuara, u vendosën në kujdesin e një shoqate për mbrojtjen e kafshëve.

Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie në Komisariatin Dixhital dhe në numrin 112, duke iu garantuar anonimat të plotë dhe reagim të menjëhershëm e të paanshëm.

LEXONI GJITHASHTU:

• VIDEO| Gruaja në Tiranë dhunon qenin e saj, e qëllon me shqelma në ashensor
• “Jam kërcënuar para 1 muaji, po investigoja një çështje të bërë mediatike”-Çelmeta