Gjirokastër, 100 studentë kontribuojnë për restaurimin e banesave të gurta

Qyteti i Gjirokastrës falë vlerave ndërtimore dhe arkitektonike po shërben si atelie natyrore për studentët dhe specialistët e rinj vendas dhe të huaj, të trashëgimisë kulturore. Një grup prej 100 studentësh, të universiteteve të vendit së bashku me pedagogët dhe specialistët e monumenteve po punojnë për studimin dhe restaurimin e banesave të gurta dhe komplekseve muzeale.

“Kemi zgjedhur qytetin e Gjirokastrës si një vlerë e madhe me trashëgimi kulturore dhe që ofron një seri banesash me vlera të veçanta arkitektonike,” – tha pedagogia Malvina Istrefaj.

Grupet e specialistëve të rinj po punojnë në rreth 20 godina muzeale disa prej të cilave simbole të qytetit të gurtë. Krahas elementëve profesionalë studentët po kontribuojnë për promovimin dhe mirëmbajtjen e tyre.

“Grupet kanë përzgjedhur secili banesën e tyre, për momentin jemi në 9 banesa kështu që grupet janë të ndara me nga 5 studentë, secili prej tyre është akomoduar që ditën e parë në banesën e përzgjedhur, kanë filluar punën dhe aktualisht jemi në banesën Fico që është një ndër banesat më interesante sidomos nga pikëpamja e detajeve arkitektonike dhe njëkohësisht ndër më të rrezikuarat nga pikëpamja e strukturës,” – tha Istrefaj.

Arkitektët e rinj shprehen të emocionuar për kontributin që po japin për restaurimin e godinave karakteristike në Gjirokastër duke shpresuar që puna e bërë të evitojë dëmtimin e mëtejshëm të tyre.

“Ne ndodhemi në banesën Fico kemi ardhur në kuadër të lëndës së restaurimit të trashëgimisë kulturore dhe po merremi me analizën e fasadave, me projektimin 3D, me problematikat që hasen,” – tregoi një studente.

“Po merremi me digjitalizimin e planimetrive dhe rilevimin e banesave dhe modelimin 3 D të  tyre, po bëjmë analiza për të zbuluar problemet e ndryshme, të cilat mund ti hasim tek këto banesa dhe me pas për ti evituar, për të bërë diçka për ti rregulluar,” – u shpreh një student.

Promovimi dhe restaurimi i banesave muzeale po ndikon në mbrojtjen e vlerave arkitektonike dhe rijetëzimin e tyre. Gjatë viteve të fundit në qytetin e Gjirokastrës është shtuar numri i njësive të turizmit familjar si dhe bujtinat karakteristike duke përmirësuar cilësinë e mikpritjes për vizitorët vendas  dhe të huaj dhe nxitur zhvillimin e turizmit.

LEXONI GJITHASHTU:

• Aktivitetet artistike rijetëzojnë muzeun e Luftës së Ftohtë në Gjirokastër
• Sekuestrohen kokainë dhe kanabis, arrestohen 2 persona në Gjirokastër