‘Egnatia, skuadra që na motivon’, Abilaliaj vlerëson rrogozhinasit

Partizani dhe Vllaznia përballen me njëra-tjetrën në Arenën e Demave pasditen e së hënës, me dy skuadrat që kanë mbyllur përgatitjet. Të kuqtë po kalojnë një formë pozitive, me 5 fitore radhazi në kampionat, teksa në anën tjetër, shkodranët do të provojnë të bëjnë mirë, ndërsa trajneri Osmani e ka vlerësuar maksimalisht kundërshtarin.

“Atmosfera ka kthyer, ne jemi të gatshëm ,edhe pse bëhet fjalë për kampionin aktual. 5 fitore radhazi, por ne kemi llogaritë tona, kemi kualitet për ndeshje të mirë e rezultat pozitiv”, tha Qatip Osmani, trajner i Vllaznisë.

Tek të kuqtë, në konferencë ka dalë sërish drejtori sportive Arbër Abilaliaj, i cili kërkon kujdes nga të tijtë në përballjen me Vllazninë.

“Është një skuadër si çdo skuadër e Superiores, e rrezikshme, e etur për pikë dhe normalisht duhet të jemi shumë të kujdesshëm sa i përket mënyrës sesi do të zhvillohet ndeshja nesër dhe duhet të jemi të përgatitur për këtë takim”, u shpreh Arbër Abilaliaj, drejtor sportive i Partizanit.

Një koment edhe për Egnatian, erdhi nga drejtori i kampionëve në fuqi.

“Janë motivim pasi janë kundërshtarët tanë direkt dhe na jep një shtysë akoma më të madhe për të bërë mirë dhe qëndruar në të njëjtin ritëm. Nëse arrijmë të nxjerrim më të mirën e njëri-tjetrit është një gjë që u bën mirë të dyja skuadrave”, tha ai.

Partizani renditet i dyti në kampionat, pas Egnatias, teksa Vllaznia qëndron në vendin e 7-të me 13 pikë të grumbulluara.