Reformë në spitale? Edi Rama i përgjigjet Euronews Albania për korrupsionin dhe ryshfetin në këtë sektor

Kryeministri i vendit, Edi Rama, iu përgjigj pyetjes së gazetares se Euronews Albania Dorina Halili për reformën në spitale dhe fenomenin e korrupsionit në sektorin e shëndetësisë.

Gjatë një bashkëbisedimi me gazetarët në Aeroportin e Rinasit ku doli për të pritur 7020 dozat e vaksinës “Pfizer”, shefi i qeverisë u shpreh se lajm i mirë është, që sistemi i ri i drejtësisë ka nisur të funksionojnë. Ai kërkoi shprehimisht nga qytetarët t’i denoncojnë rastet korruptive në spitale, në mënyrë që drejtësia të angazhohet dhe të japë fjalën e saj.

“Lajmi i mirë është që ka shenja inkurajuese të fillimit të funksionimit të institucionet e drejtësisë, këtu i referohem atij rastit të mjekut liberal të djathtë, që Edi Rama e paska futur në burg, siç u shpreh fatkeqësisht. Lajmi i mirë është se denoncimet funksionojnë, kështu që unë do isha i lumtur të shikoja çdo ditë denoncime dhe jo llafe, që ndyjnë të gjithë bluzat e bardha dhe që bëjnë pis mjekët heronj”, tha Rama.  

Kreu i mazhorancës tha se duhet të goditen dhe të vihen para përgjegjësisë të gjithë ata që abuzojnë me detyrën.

 “Unë jam i bindur se Tirja dhe doktori në fjalë [Edvin Prifti] që ishte dhe shef pavioni, të mos ishin të vetmit, por të vazhdojnë të vihen para përgjegjësisë. Kjo bëhet në të dyja shina, njëra shinë është që sistemi të fillojë të forcohet”, tha Rama.

Sa i takon reformës në spitale, Rama tha se nuk mund të bëhet një e tillë nëse nuk ke infrastrukturën kryesore.

“Nuk mund të bësh reformë të thellë kur s’ke ilaçe, kur s’ke batanije, kur s’ke ngrohje. Duhet të ndërtosh infrastrukturën, zinxhirët e tjerë dhe pastaj kalon në faza të tjera. “Tiret” kanë ekzistuar historikisht dhe nuk janë fenomene të sotme”, tha ai.