Shkrimet lidhur me 2 xhami në Viti, kërcënohen me vdekje dy gazetarë në Kosovë

Dy gazetarë në Kosovë, Fatos Hetemi dhe Irfan Maliqi, janë kërcënuar me vdekje.

Lajmin e ka bërë të ditur vetë Asociacioni i Gazetarëve të Kosovës përmes një reagimi në Facebook, ku ka bërë me dije se gazetarët punonin për Plus Tv nga Vitia.

Po ashtu bëhet me dije se Hetemi e Maliqi kanë njoftuar AGK-në për mesazhet kërcënuese që kanë marrë, pas shkrimeve për dy xhamitë ne Komunën e Vitisë.

AGK i ka bërë thirrje Policisë së Kosovës që të kujdeset për sigurinë e gazetaëreve dhe stafit të Plus Tv.

Reagimi i plotë:

Kërcënohen me vrasje Fatos Hetemi dhe Irfan Maliqi nga Plus TV në Viti

Janë kërcënuar me vrasje gazetarët e medias lokale nga Vitia, Plus TV, Fatos Hetemi dhe Irfan Maliqi.

Redaksia e Plus TV, e ka njoftuar Asociacionin e Gazetarëve të Kosovës se mesazhet kërcënuese me vrasje i kanë pranuar nga një llogari në rrjetin social Facebook, pas shkrimeve të fundit të kësaj medie lidhur me dy xhamitë në Komunën e Vitisë.

“Mesazhet kërcënuese me vrasje janë në drejtim drejtorit Fatos Hetemi dhe gazetarit Irfan Maliqi nga PlusTV…Këto kërcënime ndërlidhen me serinë e raportimeve të televizionit Plus lidhur me problemet e shqetësimet që kanë të bëjnë me xhamitë në Skifteraj dhe Ramnishtë, në këtë komunë, pasi Bashkësia Islame e Vitisë, në kuadër të BIK-ut, thotë se dy xhamitë, njëra në fshatin Skifteraj dhe tjetra në Ramnishtë, janë jashtë kontrollit dhe menaxhimit të BIK-ut dhe se frekuentohen nga njerëz të dyshimtë.”, thuhet ndër të tjera në njoftimin e redaksisë.

Plus TV ka njoftuar se për kërcënimet i kanë njoftuar Policinë e Kosovës në Rajonin e Gjilanit.

AGK-ja, e vlerëson shumë serioz dhe të rrezikshëm kërcënimin dhe e dënon në termat më të fortë.

AGK-ja, e fton Policinë e Kosovës të kujdeset për sigurinë e gazetarëve dhe stafit tjetër të televizionit dhe të punojë intensivisht për identifikimin dhe arrestimin e personit përgjegjës për kërcënimin.

LEXONI GJITHASHTU:

• 41% më shumë raste të kërcënimit ndaj mediave në 2021, tregon raporti
• Britania e Madhe vendos sanksione ndaj mediave ruse