Begaj në Samitin e Diasporës: Te arbëreshët shikojmë veten në pasqyrën e historisë

Presidenti Bajram Begaj ishte këtë të mërkurë i pranishëm në Samitin e Diasporës në Tiranë, ku gjatë fjalës së tij tha se Shqipëria është me fat të ketë një komunitet të tillë unik siç janë arbëreshët e vendosur në Itali.

Ai tha se arbëreshët ndër shekuj kanë dhënë shembullin më të mirë të integrimit dhe zhvillimit të një marrëdhënie organike mes Shqipërisë dhe Italisë dhe kanë dhënë një kontribut të paçmueshëm për të dy vendet.

“Është mbresëlënëse dhe unikale çdo element që reflekton dashurinë për atdheun, te arbëreshët ne shikojmë veten në pasqyrën e historisë. Ata përbëjnë një thesar të paçmuar për të mësuar jo vetëm se kush ishim, por edhe për të kuptuar se kush jemi.

Eksodi i tyre ishte dramatik, por historia e tyre është një histori suksesi. Ata janë shembull i integrimit dhe i zhvillimit të një marrëdhënie organike midis dy popujve fqinjë, shqiptarë me origjinë dhe tashmë italianë, arbëreshët ruajtën me krenari traditat dhe gjuhën e të parëve. Ata ndërtuan gjithashtu institucione ku u shkolluan dhe u diplomuan personalitete të rilindjes shqiptare dhe personalitete të rëndësishëm për Italinë”,-tha Begaj.

LEXONI GJITHASHTU:

• Dita Arbëreshe/ Hasani: Mirënjohje atyre që promovojnë zhvillimin kulturor
• Realiteti arbëreshë/ Lorik Cana zbulon dokumentarin që do bashkojë gjithë shqiptarët