City ndalet nga Liverpool, s’ka fitues në “Etihad Stadium”. Ekipet ndajnë nga 1 pikë

Shumë spektakël për një pikë. Nuk ka fitues në super sfidën Man.City-Liverpool, me dy ekipet që ndajnë nga një pikë pas barazimit 1-1.

Është mbyllur në barazim 1-1 kryendeshja e javës së 13-të të Premier League. Sitizens mbeten në krye të kampionatit përkohësisht, një pikë larg Të Kuqve. Ka qenë i përhershmi Haaland që ka zhbllokuar takimin në minutën e 27-të. Norvegjezi ka shënuar kundër 20 nga 21 skuadrat me të cilat është përballur në kampionatin anglez me Brentford që është i vetmi ekip që nuk është ndëshkuar nga Haaland.

Kur dukej se City do të merrte tri pikët radhës ka ardhur goli i Alexander-Arnold në minutën e 80-të që ka fiksuar shifrat në 1-1. Tension në fund të ndeshjes, me Nunez që ka pasur një përplasje me Guardiola-n, por Klopp është futur mes të dyve duke shmangur që situata të përkeqësohej.

Pas kësaj perballjeje Manchester City kryeson Premier League me 29 pikë, ne pritje te Arsenal dhe Tottenham, me dy ekipet londineze që kanë një ndeshje më pak.