Fillimisht e pranoi më pas e mohoi, përfshirja e Murselit në vrasjen e Liridonës

Zëdhënësja e Prokurorisë së Prishtinës, Laureta Ulaj tha në një intervistë për “Good morning Albanians” në Euronews Albania se pavarësisht deklaratës fillestre të bashkëshortit të Liridona Ademajt se ka qenë ai që ka urdhëruar vrasjen e saj, nuk mund të jepen detaje të mëtejshme për të mos dëmtuar procedurën.

Naim Murseli në seancën e fundit dëgjimore deklaroi se nuk kishte ikur nga vendi i ngjarjes madje kishte qenë dhe vet i rrezikuar, duke mohuar kështu përfshirjen në vrasjen e bashkëshortes së tij, një deklaratë kjo kontradiktore, krahasuar me të parën.

“Duhet të kemi parasysh se ndodhemi në fazën e fillimit të procedurës së hetimit dhe vetëm gjatë ditës së djeshme ka qenë seanca dëgjimore që është mbajtur në kuadër të aprovimit të kërkesës së prokurorisë. Dyshimet çojnë drejt një vrasje të rëndë me inskenim të grabitjes dhe nga dyshimet deri tani, këto veprime bashkëshorti i të ndjerës i ka kryer duke e inskenuar si grabitje dhe kishte premtuar shumën e të hollave prej 30 mijë euro. Në fazën që ndodhemi tani, prokuroria në koordinim dhe me policinë dhe institucione të tjera është duke punuar drejt ndriçimit të gjithë këtyre dyshimeve dhe për të arritur ky rast një epilog përfundimtar,” – u shpreh Ulaj.

LEXONI GJITHASHTU:

• Familjes Ademaj i aprovohet kërkesa për rivarrim të Liridonës
• Vrasja e Liridona Ademajt, vjen reagimi i Albin Kurtit