“Më mirë që linda e verbër dhe nuk u bëra gjatë jetës” – Emocionon 31-vjeçarja

Doljana Velia e ka kaluar fëmijërinë në qytetin e Vlorës. Ndonëse me aftësi të kufizuara të shikimit në 2013 ajo përfundoi Liceun Artistik për kanto, ndërsa në 2016 ka përfunduar studimet për marrëdhënie me publikun, komunikim.

Në periudhën 2017-2021 Doljana realizoi ëndrrën për një diplomë të dytë në psikologji këshillimi.

Krahas studimeve, ajo ka marrë pjesë në shumë trajnime brenda dhe jashtë vendit . Qysh në moshën 16 vjeçare Doljana ka filluar të aktivizohet në organizata për të drejtat e personave me aftësi të kufizuar si dhe vazhdon të jete advokuese për këtë target grup. Ajo është pjesë e një organizatë për integrimin dhe promovimin e të rinjve të talentuar PAK.

31-vjeçarja tregoi në një intervistë për emisionin GoodMorning Albanians në Euronews Albania se kufizimi i shikimit nuk e pengon të ketë një jetë të mbushur me aktivitete, por shtoi se mungesa e infrastrukturës dhe literaturës ia vështirëson jetën njerëzve me aftësi të kufizuara.

“Nuk është fat të jesh i verbër por është fat që të mos e fitosh gjatë jetës verbërinë por ta kesh të lindur. Është njësoj si t’u them unë nëse ju mungon një shqisë që s’e keni pasur kurrë, nëse ju them ju mungon të fluturoni, ju duket qesharake. E njëjta gjë është edhe me personat që lindin me këtë mungesë në shikim. Ne hasemi me vështirësi nëse na mungojnë shërbime të caktuara në infrastrukturë apo literaturë”, tha ajo.

LEXONI GJITHASHTU:

• Personat paraplegjikë ankohen për heqje të pagesave sanitare
• 60-vjeçari me karrocë: 1200 € shkon paketa higjienike për një paraplegjik