Protesta për vrasjen e Liridonës/ Aktivistja: Do dalim në terr të kërkojmë drejtësi

Luljeta Demolli, drejtoreshë te “Qendra Kosovare për studime gjinore”, ishte këtë të hënë e ftuar në Euronews Albania për të folur rreth ngjarjes tragjike të ndodhur mbrëmjen e 29 nëntorit, ku Liridona Murseli Ademajt ju mor jeta në mënyrë mizore para syve të fëmijëve të saj.

Ajo që e bën më të rëndë këtë ngjarje është se gjithçka ishte e planifikuar nga bashkëshorti i saj Naimi. Luljeta Demolli tha se shteti duhet të tregohet më i rreptë me ligjet, pasi nuk është Liridona e para grua që vritet në Kosovë. Ajo tha se ndikim në shtimin e vrasjeve të grave ka pasur edhe lejimi i mbajtjes së armëve në shtëpi.

“Armët në Kosovë, asnjë zë i institucioneve nuk është në drejtim të qytetarëve. Në Kosovë, të blesh e të mbash një armë është shumë e lehtë. Unë ftoj institucionet e rëndit dhe të sigurisë të bëjnë apel dhe bastisje më të shpeshta për t’i larguar armët nga shtëpitë, pasi armët i japin zemër.

Edhe rasti i Liridonës, nuk është shteti pa faj, se ishte një person i FSK-së i përfshirë, që i dha armën një personi tjetër për të vrarë. Ndaj nesër ne do dalim në protestë, do dalim në terr të kërkojmë drejtësi”,-tha Luljeta Demolli.

LEXONI GJITHASHTU:

• Vrasja e Liridona Ademajt, vjen reagimi i Albin Kurtit
• FOTO| Motra e Liridona Ademajt publikon bisedën me të ndjerën, kërkon drejtësi